 83.27b སེང་གེས་ཐལ་མོ་སྦྱར་བྱས་ཏེ། །རྫོགས་སངས་རྒྱས་ལ་ཞུས་པ་ནི། །བྱང་ཆུབ་སེམས་དཔའི་སྤྱོད་པ་གང ། །དེ་ནི་འདྲེན་པས་བདག་ལ་གསུངས། །གང་གིས་མཛེས་པར་འགྱུར་བ་ལགས། །གང་གིས་རྫུས་ཏེ་སྐྱེ་བར་འགྱུར། །སྐྱེ་བ་དྲན་པར་ཇི་ལྟར་འགྱུར། །ཐུབ་པ་ཆེན་པོས་ལུང་བསྟན་གསོལ། །དེ་དག་ལྷག་བསམ་ཡེ་ཤེས་ཀྱིས། །མཁྱེན་ནས་སངས་རྒྱས་ལུང་བསྟན་པ། །བྱང་ཆུབ་སེམས་དཔའ་སྤྱོད་གང་ཞེས། །ཁྱོད་ཀྱིས་དྲིས་པ་དེ་བསྟན་ཏོ། །བཟོད་པ་ཡིས་ནི་མཛེས་པར་འགྱུར། །ཚངས་པར་སྤྱད་པས་རྫུས་ཏེ་སྐྱེ། །ཆོས་ཀྱི་སྦྱིན་པས་སྐྱེ་བ་དྲན། །གཞོན་ནུ་དེ་ལྟར་ཤེས་པར་གྱིས། །གང་གིས་སུམ་བཅུ་རྩ་གཉིས་མཚན། །དཔེ་བྱད་བཟང་པོ་བརྒྱད་བཅུ་དང ། །གསེར་མདོག་འདྲ་བའི་ལུས་འགྱུར་ཞིང ། །དེ་མཐོང་སེམས་ཅན་དགའ་བར་འགྱུར། །སྦྱིན་པ་ཀུན་གྱིས་མཚན་དུ་འགྱུར། །བྱམས་པས་དེ་བཞིན་དཔེ་བྱད་བཟང ། །སེམས་ཅན་ཀུན་ལ་སེམས་མཉམ་པས། །རྒྱལ་བ་གསེར་གྱི་མདོག་འདྲར་འགྱུར། །གཟུངས་ནི་གང་གིས་ཐོབ་པར་འགྱུར། །གང་གིས་ཏིང་འཛིན་སྐྱེ་འགྱུར་ལགས། །གཟུང་བའི་ཚིག་ཏུ་གང་གིས་འགྱུར། །ཐུབ་པ་ཆེན་པོས་ལུང་བསྟན་གསོལ། །ཆོས་ལ་བཟོད་པས་གཟུངས་རྣམས་འཐོབ། །སེམས་བསྒོམས་པས་ནི་ཏིང་འཛིན་སྐྱེ། །ཀྱལ་བའི་ཚིག་རྣམས་སྤང་བྱས་ན། །གཟུང་བར་འོས་པའི་ཚིག་ཏུ་འགྱུར། །དྲན་དང་ལྡན་པར་ཇི་ལྟར་འགྱུར། །ཐུབ་པ་ཇི་ལྟར་བློ་གྲོས་ལྡན། །ཇི་ལྟར་ཆོས་སྤྱོད་འགྱུར་བ་ལགས། །སྐྱེ་བུ་དམ་པ་མཁས་ཅིས་འགྱུར། །གཡོ་མེད་པས་ནི་དྲན་ལྡན་འགྱུར། །དོན་ལ་སེམས་པས་བློ་གྲོས་ལྡན། །གུས་དང་བཅས་པས་ཆོས་སྤྱོད་འགྱུར། །ཆོས་ཀྱི་མཚན་ཉིད་རྟོགས་པས་མཁས། །འཇིག་རྟེན་མགོན་པོའི་སྤྱན་སྔར་ནི། །ལས་གང་གིས་ནི་སྐྱེ་བར་འགྱུར། །འཇིག་རྟེན་མགོན་གྱི་མངོན་སུམ་དུ། །ཞུ་བ་ཞུ་བར་ཇི་ལྟར་འགྱུར། །གང་ཞིག་ཆོས་ཀྱི་སྦྱིན་པ་ལ། །ནམ་ཡང་བར་ཆད་མི་བྱེད་པ། །དེ་ནི་དེས་ན་མྱུར་རབ་ཏུ། །འཇིག་རྟེན་མགོན་དང་ཕྲད་པར་འགྱུར། །གང་གིས་མི་ཁོམ་སྤོང་བར་འགྱུར། །གང་གིས་བཟང་འགྲོར་མཆི་འགྱུར་ལགས། ། |
